KRM “Pastrimi” ka alarmuar për rrezikun që mund të pësojë projekti strategjik i menaxhimit të mbeturinave në Rajonin e Prishtinës, me vlerë rreth 74 milionë euro. Kjo për shkak të mosnënshkrimit të marrëveshjeve të financimit ndërmjet Ministrisë së Financave dhe Bankës Gjermane për Zhvillim (KfW), çka mund të ndalojë vazhdimin e projektit të mbështetur nga Bashkimi Evropian dhe KfW. Projekti prek gjashtë komuna dhe mbi 500 mijë banorë dhe përfshin investime të rëndësishme si ndarja në burim e mbeturinave, riciklimi, blerja e kamionëve dhe kontejnerëve të rinj, si dhe përmirësime infrastrukturore. KRM “Pastrimi” ka bërë thirrje për angazhim institucional dhe bashkëpunim me partnerët ndërkombëtarë për të shmangur shtyrjen apo humbjen e këtyre investimeve të rëndësishme për mjedisin dhe shërbimet ndaj qytetarëve.