Ministrja e Energjisë, Minierave dhe Burimeve Minerale të Maqedonisë së Veriut, Sanja Bozhinovska, mori pjesë në Forumin e Biznesit Maqedonia e Veriut – Turqia në Stamboll, ku u diskutua thellimi i bashkëpunimit ekonomik dhe rritja e investimeve turke në vend. Në këtë ngjarje të rëndësishme, ku mori pjesë edhe delegacioni qeveritar i udhëhequr nga kryeministri Hristijan Mickoski, u theksua rëndësia e avancimit të marrëdhënieve dypalëshe dhe krijimit të mundësive të reja për partneritete ndërmjet kompanive dhe institucioneve të dy vendeve. Ministrja Bozhinovska prezantoi potencialet e Maqedonisë së Veriut në sektorët e energjetikës, minierave dhe burimeve minerale, si dhe proceset reformuese për krijimin e një klime investuese të qëndrueshme dhe konkurruese. Në margjinat e forumit, ajo zhvilloi një takim me ministrin e Tregtisë së Turqisë, Omer Bolat, ku u diskutuan mundësitë për avancimin e bashkëpunimit ekonomik dhe rritjen e investimeve turke në sektorët strategjikë të Maqedonisë së Veriut.