Ekonomia e Maqedonisë së Veriut pritet të rritet me 3.5% gjatë vitit 2026, ndërsa vitin e ardhshëm kjo rritje do të përshpejtohet në 3.8%. Ky zhvillim mbështetet kryesisht në investimet, sidomos në projektet e infrastrukturës publike, si dhe në rimëkëmbjen graduale të kërkesës së jashtme. Guvernatori Trajko Sllaveski theksoi se ekonomia botërore po përballet me rreziqe të konsiderueshme, përfshirë konfliktet gjeopolitike në Lindjen e Mesme, të cilat ndikojnë në çmimet e produkteve primare dhe tregjet globale. Megjithatë, parashikimet bazohen në një skenar optimist që supozon përfundim të shpejtë të konflikteve dhe stabilizim të inflacionit, me pritshmëri për një rënie graduale të inflacionit në vitet në vijim.