Aleanca Kosovare e Bizneseve (AKB) mirëpret rritjen ekonomike prej 5.43% të raportuar nga Qeveria e Kosovës, por thekson se kjo shifër duhet të analizohet në kontekstin e inflacionit prej rreth 7.5%, që zvogëlon rritjen reale të ekonomisë. AKB vëren se për qytetarët dhe bizneset nuk ka përmirësim të dukshëm në standardin e jetesës, pasi kostoja e lartë e energjisë, mungesa e fuqisë punëtore dhe vështirësitë në zgjerim vazhdojnë të pengojnë sektorin privat. Sipas kryetarit të AKB-së, Agim Shahini, rritja ekonomike duket të jetë nxitur kryesisht nga konsumimi, fondet sociale dhe remitancat, ndërsa sektori prodhues dhe investimet private mbeten të kufizuara. Ai kërkon transparencë mbi strukturën e rritjes dhe thekson se suksesi ekonomik duhet të matet me mirëqenien reale të qytetarëve dhe zhvillimin e qëndrueshëm të biznesit, jo vetëm me tregues makroekonomikë.