Kryeministri në detyrë i Kosovës, Albin Kurti, së bashku me ministrin në detyrë të Financave, Hekuran Murati, vizituan Administratën Tatimore të Kosovës (ATK) për të diskutuar mbi rezultatet e arritura dhe sfidat në fushën tatimore. Gjatë takimit u theksua një rritje prej 14% e të hyrave tatimore dhe një rritje prej 43.1% e denoncimeve për evazion fiskal, si dhe një shtim me mbi 17 mijë punëtorë të deklaruar krahasuar me vitin e kaluar. Drejtori i ATK-së, Mentor Hyseni, njoftoi se institucionit i është ndryshuar qasja, duke u fokusuar më shumë në kontrolle të bazuara në analiza risku dhe duke ulur numrin e gjobave me rreth 22%. Gjithashtu, ATK-ja ka avancuar digjitalizimin e shërbimeve, duke ofruar aktualisht 62 shërbime online për të lehtësuar përmbushjen e obligimeve tatimore dhe për të rritur transparencën ndaj tatimpaguesve.