Ministri i Infrastrukturës dhe Transportit, Dimal Basha, ka inspektuar punimet në rrugën Kaçanik–Kërbliq–Viti, një projekt me vlerë mbi 2 milionë euro dhe gjatësi rreth 11 kilometra. Aktualisht po përfundohet asfaltimi i pjesës së mbetur, duke e afruar rrugën drejt përfundimit të plotë dhe duke përmirësuar ndjeshëm lidhjen dhe qarkullimin për banorët e zonës. Ky investim pritet të nxisë zhvillimin e turizmit malor dhe bizneseve lokale, duke lehtësuar qasjen drejt atraksioneve natyrore si dy ujëvarat e fshatit Kërbliq. Qeveria “Kurti” vazhdon të përqendrohet në përmirësimin e infrastrukturës rrugore në zonat malore për të krijuar kushte më të mira për zhvillim ekonomik dhe turistik të qëndrueshëm.