Ministri në detyrë i Infrastrukturës dhe Transportit, Dimal Basha, njoftoi se punimet në rrugën “Ekrem Rexha – Drini” në fshatin Lubizhdë të Prizrenit po ecin më shpejt se parashikimi. Deri tani janë përfunduar 1,750 metra kanalizim atmosferik dhe fekal, si dhe 1,000 metra instalime nëntokësore për energjetikë, telekomunikacion, ujësjellës dhe ndriçim publik. Një segment prej 500 metrash ka përfunduar plotësisht infrastruktura nëntokësore, ndërsa tashmë janë në përgatitje gurët skajorë. Asfaltimi i rrugës pritet të fillojë gjatë muajit gusht, ndërsa investimet infrastrukturore do të vazhdojnë në komuna të ndryshme për të përmirësuar sigurinë dhe kushtet e jetesës së qytetarëve.