Radio Televizioni i Kosovës po përballet me rrezikun e tërheqjes së mbi 800 mijë eurove nga llogaritë e tij pas një procedure përmbarimore të iniciuar nga kompania “Grand Media”, pas një aktvendimi të Gjykatës Komerciale që la në fuqi urdhrin përmbarimor të dhjetorit 2025. RTK ka kërkuar shtyrje të pagesës deri në vendimin përfundimtar të Gjykatës Supreme, duke argumentuar se ekzekutimi i menjëhershëm do të bllokojë llogaritë, do të rrezikojë pagat e punonjësve dhe funksionimin normal të transmetuesit publik. Nga ana tjetër, kompania “Grand Media” ka kërkuar zbatim të menjëhershëm të përmbarimit dhe ka paraqitur oferta për marrëveshje me kushte të reja kontraktuale, duke ngritur dyshime për përdorimin e presionit financiar si instrument ndikimi ndaj RTK-së. Menaxhmenti i RTK-së paralajmëron se një veprim i tillë do të ketë pasoja serioze për stabilitetin financiar dhe funksionimin institucional, ndërsa do të ushtrojë mjete të mëtejshme juridike për mbrojtjen e interesit publik dhe institucioneve kombëtare.