Shqiptarët shpenzojnë një pjesë shumë më të madhe të buxhetit të tyre për ushqime sesa mesatarja europiane, pavarësisht se të ardhurat për frymë janë vetëm rreth 32% të nivelit në BE. Nga 8,656 euro konsum vjetor për banor në Shqipëri, 29% shkojnë për ushqime dhe pije joalkoolike, krahasuar me vetëm 10.4% në Bashkimin Europian. Kjo tregon një varfëri relative dhe një fokus të lartë në nevojat bazë, ndërsa shpenzimet për banesën, energjinë, shëndetësinë dhe transportin janë më të ulëta në Shqipëri në krahasim me BE-në. Një tjetër dallim i rëndësishëm është pesha e lartë e shpenzimeve për rekreacion dhe kulturë, e cila në të dhënat zyrtare duket e fryrë për shkak të metodologjisë së përllogaritjes, ndërsa në anketat familjare është shumë më e ulët.