Gjatë tri viteve të fundit, institucionet qendrore dhe lokale të Kosovës kanë shpenzuar rreth 40 milionë euro për derivate të naftës dhe shërbime telefoni mobile, sipas raporteve zyrtare të Ministrisë së Financave. Këto shpenzime janë realizuar gjatë mandatit të kryeministrit Albin Kurti, i cili më parë kishte kritikuar qeveritë e kaluara për shpenzime të larta, por që tani shpenzimet janë rritur në vend që të ulen. Vetëm në vitin 2025, shpenzimet për derivate të automjeteve, gjeneratorë dhe makineri kanë arritur në 10.5 milionë euro, ndërsa ato për telefoni mobile janë rreth 2.4 milionë euro. Anëtari i Kryesisë së Lidhjes Demokratike të Kosovës, Berat Rukiqi, ka kritikuar ashpër këto shpenzime, duke i cilësuar të tepruara dhe të pajustifikuara, veçanërisht për veturat dhe shpenzimet operative, që sipas tij kalojnë çdo kufi të arsyeshëm dhe janë në kundërshtim me premtimet e qeverisë.