Qeveria shqiptare ka miratuar procedura të reja për pezullimin dhe revokimin e licencave të operatorëve të basteve sportive online, duke përcaktuar qartë shkaqet e ndëshkimit si mosrespektimi i kushteve të licencimit dhe mospagimi i detyrimeve financiare. Autoriteti i Mbikëqyrjes së Lojërave të Fatit dhe Komisioni i Licencave do të nisin procedurat, ndërsa vendimin përfundimtar do ta marrë ministri i Financave. Operatorëve u garantohet e drejta për t’u dëgjuar dhe për të paraqitur argumente, ndërsa pezullimi i licencës mund të zgjasë nga 30 ditë deri në dy vjet, gjatë së cilës nuk mund të ushtrojnë aktivitetin. Për më tepër, pranë Ministrisë së Financave do të formohet një komision AD-HOC për shqyrtimin e rasteve, dhe operatorët kanë mundësinë e ankimimit në gjykatë.