Shqipëria po ndryshon rregullat e punësimit duke përfshirë në mënyrë të veçantë shtetasit shqiptarë që jetojnë jashtë vendit, të cilët do të kenë akses në shërbimet dhe programet e punësimit në vend. Ligji i ri përfshin gjithashtu të huajt që jetojnë ligjërisht në Shqipëri për qëllime punësimi, duke u mundësuar atyre akses në informacion, këshillim dhe ndërmjetësim për vende pune. Një tjetër nismë e rëndësishme është krijimi i Observatorit të Tregut të Punës dhe Aftësive, i cili do të monitorojë kërkesën dhe ofertën për punë, si dhe nevojat për aftësi në ekonominë shqiptare. Përveç kësaj, ligji parashikon programe orientimi dhe riaftësimi për ata që rrezikojnë të humbasin punën për shkak të ndryshimeve ekonomike apo teknologjike, me qëllim reduktimin e informalitetit dhe përmirësimin e shkallës së punësimit në vend.