Për herë të parë në Shqipëri, po hartohen 38 protokolle kombëtare për trajtimin e kancerit, të cilat do të zbatohen në të gjitha spitalet bashkiake dhe rajonale. Ministrja e Shëndetësisë, Evis Sala, theksoi se këto protokolle janë të bazuara në udhërrëfyesit e Institutit të Tumoreve në Milano dhe synojnë të unifikojnë kujdesin onkologjik në të gjithë vendin, duke garantuar standarde të njëjta si në qendrat më të mira europiane. Reforma përfshin krijimin e një rrjeti të integruar kombëtar që do të udhëheqë pacientët në trajtim, nga mjeku i familjes deri te qendrat rajonale dhe QSUNT, duke përdorur referime elektronike dhe koordinim të plotë ndërmjet strukturave shëndetësore. Ministrja nënvizoi rëndësinë e parandalimit, depistimit dhe diagnostikimit të hershëm, duke synuar që pacientët të trajtohen sa më shpejt dhe me cilësi të lartë pranë vendbanimit të tyre.