Shqipëria ka vendosur të ndalojë importet e mishit nga Brazili, një vend që deri tani furnizonte rreth një të tretën e tregut shqiptar të mishit të importuar. Ky vendim erdhi pas kërkesës së Bashkimit Europian dhe hyn në fuqi nga kjo e enjte, duke hequr Brazilin si një nga burimet kryesore të mishit në vend. Gjatë këtij viti, nga janari deri në korrik, 33% e mishit të importuar në Shqipëri vinte nga Brazili, ndërsa kjo peshë ka pësuar rritje të vazhdueshme që nga viti 2021. Me mbylljen e kësaj rruge tregtare, importuesit do të duhet të gjejnë alternativa të tjera, të cilat mund të jenë më të shtrenjta, duke krijuar presion për rritjen e çmimeve të mishit në tregun vendas. Megjithatë, është ende e paqartë nëse kjo do të reflektohet menjëherë tek konsumatori final.