Këshilli i Ministrave i Shqipërisë ka miratuar në parim një marrëveshje për një hua direkte prej 302 milionë dollarësh nga Shtetet e Bashkuara të Amerikës, e cila do të përdoret për financimin e sektorit ushtarak dhe të sigurisë në vend. Ky financim bëhet në kuadër të programit të Financimit të Jashtëm Ushtarak (FMF) dhe u propozua nga Ministria e Mbrojtjes dhe Ministria e Financave, duke u mbështetur në kuadrin kushtetues dhe ligjor për marrëveshjet ndërkombëtare. Në këtë transaksion, Shqipëria përfaqësohet nga autoritetet financiare, ndërsa pala amerikane nga Agjencia e Bashkëpunimit për Sigurinë e Mbrojtjes (DSCA). Vendimi synon të forcojë kapacitetet mbrojtëse dhe sigurinë kombëtare, duke shënuar një hap të rëndësishëm në bashkëpunimin ushtarak midis dy vendeve.