Shqipëria është vendi i vetëm në rajon ku çmimet e ushqimeve kanë kaluar mesataren e Bashkimit Europian, duke arritur në 103% të nivelit të BE-së sipas fuqisë blerëse, ndërkohë që të ardhurat për frymë janë vetëm 43% e mesatares europiane. Kjo situatë bën që familjet shqiptare të shpenzojnë një pjesë shumë më të madhe të buxhetit për ushqim, duke ndikuar negativisht në fuqinë reale blerëse dhe perceptimin për mirëqenien. Çmimet e larta vijnë si pasojë e mungesës së konkurrueshmërisë dhe importit të produkteve të shtrenjta, pavarësisht se Shqipëria mbetet një vend me një sektor bujqësor të madh. Ankesa për çmimet e larta nuk vijnë vetëm nga konsumatorët vendas, por edhe nga turistët, të cilët në forume ndërkombëtare theksojnë se supermarketet në Shqipëri janë më të shtrenjta se në shumë vende të Europës Perëndimore.