Zyra Kombëtare e Auditimit ka zbuluar se Komuna e Prishtinës nuk ka qenë as efikase dhe as efektive në grumbullimin e mbeturinave, duke dështuar në pothuajse të gjitha hallkat e mbikëqyrjes institucionale. Bordi i KRM “Pastrimi” nuk ka ushtruar mbikëqyrje adekuate, ndërsa numri i kamionëve aktivë për mbledhjen e mbeturinave ka rënë dhe investimet për zëvendësimin e tyre nuk janë realizuar sipas planit. Për më tepër, operatorët privatë të angazhuar nga Komuna kanë kushtuar më shtrenjtë, pa sjellë përmirësime të dukshme në shërbim, ndërkohë që qindra kontejnerë të blerë kanë mbetur të papërdorur ose janë dëmtuar për shkak të mungesës së njohurive të stafit. Auditorja e Përgjithshme, Vlora Spanca, theksoi gjithashtu mangësi serioze në raportimin financiar dhe shkelje në procedurat e prokurimit në disa institucione dhe ndërmarrje publike, duke njoftuar se gjatë vitit 2025 janë dërguar 80 raste në Prokurorinë e Shtetit.