Ministria e Arsimit, Shkencës, Teknologjisë dhe Inovacionit (MASHTI) ka konfirmuar se edhe për vitin shkollor 2026-2027 do të vazhdojë subvencionimi i teksteve dhe materialeve shkollore për nxënësit. Ndryshimi kryesor qëndron në mënyrën e shpërndarjes së subvencioneve, ku paratë nuk do të ndahen më përmes bankave shkollore, por do të transferohen direkt në xhirollogaritë e prindërve. Ministri në detyrë i Arsimit, Hajrulla Çeku, njoftoi se së shpejti do të hapet afati për aplikim për këtë mbështetje financiare. Përpara fillimit të këtij procesi, drejtoritë komunale kanë përsëritur kërkesën për këtë mënyrë të re të shpërndarjes, e cila pritet të nisë nga dita e premte.