Drejtori i Infrastrukturës në Ferizaj, Meriton Hajdini, ka zbuluar se kontrata kolektive ka shkaktuar një dëmtim të madh financiar për komunën, duke i marrë rreth 17 milionë euro nga buxheti i saj. Nga kjo shumë, afërsisht 14 milionë euro janë të dedikuara për investime kapitale, gjë që ka ndikuar drejtpërdrejt në ngadalësimin e realizimit të projekteve infrastrukturore në Ferizaj. Hajdini ka theksuar se për shkak të kësaj kontrate, disa projekte po ecin me një dinamikë më të ulët se sa ishte parashikuar. Ai ka folur për këto çështje në një lidhje direkte në emisionin “Adresa e Ankesave” në Kanal 10, duke dhënë detaje mbi situatën aktuale dhe planet për të ardhmen.