Në një tryezë të organizuar nga Oda Ekonomike e Kosovës dhe Instituti Riinvest u diskutua rëndësia e diversifikimit të burimeve të energjisë për sigurinë kombëtare dhe zhvillimin ekonomik të Kosovës. Kryetari i Odës Ekonomike, Lulzim Rafuna, theksoi se energjia është një faktor kyç për konkurrencën e bizneseve dhe tërheqjen e investimeve, duke nënvizuar nevojën për një sistem energjetik të qëndrueshëm dhe me çmime konkurruese. Ekspertët u pajtuan se gazit natyror duhet t’i jepet një vlerësim serioz dhe profesional si një nga opsionet për diversifikim, duke mos u fokusuar vetëm në burimet tradicionale apo ripërtëritëse, ndërsa theksuan se tranzicioni energjetik kërkon kohë dhe përpjekje të vazhdueshme. Përfaqësues të sektorit prodhues nënvizuan sfidat e furnizimit të qëndrueshëm me energji dhe ndikimin e luhatjeve të çmimeve në planifikimin e biznesit, duke theksuar nevojën për një miks të burimeve energjetike që do të sigurojë stabilitet dhe konkurrueshmëri në tregun rajonal dhe evropian.