Aleanca Kosovare e Bizneseve (AKB) ka kritikuar ashpër shitjen e thëngjillit të Kosovës në Maqedoninë e Veriut, duke theksuar se vendi po humb mundësinë për të prodhuar energji dhe për të krijuar vlerë të shtuar nga kjo pasuri natyrore. AKB ka kërkuar sqarim nëse marrëveshja me kompaninë maqedonase ESM i jep asaj të drejtën për tenderimin e nxjerrjes dhe transportit të thëngjillit, ndërsa ka vënë në dyshim interesin ekonomik të Kosovës në këtë proces. Organizata ka kujtuar anulimin e kontratës me ContourGlobal për ndërtimin e Termocentralit “Kosova e Re”, projekt që do të kishte rritur sigurinë energjetike dhe do të kishte krijuar vende pune dhe mundësi eksporti. Në reagim përmendet edhe mbyllja e kompanisë “Kosova Thëngjill”, e cila kishte mbi 170 punëtorë dhe ekskluzivitet në tregtinë e thëngjillit, duke theksuar se vlera ekonomike e këtij aktiviteti po përfundojnë jashtë Kosovës, gjë që sipas AKB-së nuk mund të quhet sukses ekonomik.