Ministria për Punë, Familje dhe Vlerat e Luftës Çlirimtare së bashku me Deutsche Gesellschaft für Internationale Zusammenarbeit kanë nënshkruar marrëveshjen e zbatimit për projektin “Fuqizimi Ekonomik i Grave”. Ky projekt synon të rrisë pjesëmarrjen e grave në tregun e punës, me fokus të veçantë tek gratë nga zonat rurale dhe grupet më pak të përfaqësuara. Përmes tij do të përmirësohen kushtet strukturore dhe sociale, do të fuqizohen kapacitetet institucionale dhe do të promovohen politika aktive të punësimit. Bashkëpunimi ndërmjet ministrisë dhe Agjencisë së Punësimit do të mbështesë ndërmarrjet sociale dhe do të krijojë një grup pune për vlerësimin dhe planifikimin e aktiviteteve të mëtejshme, duke forcuar kështu zhvillimin ekonomik dhe social të Kosovës.