Ministri në detyrë i Infrastrukturës dhe Transportit, Dimal Basha, ka marrë pjesë në takimin e nivelit të lartë të Western Balkans Investment Framework (WBIF), ku u diskutua ecuria e projekteve aktuale dhe ato të reja në sektorin e transportit dhe infrastrukturës në Kosovë. Gjatë këtij takimi, Basha rikonfirmoi përkushtimin e ministrisë për realizimin e projekteve strategjike që synojnë lidhjen e Kosovës me Korridorin VIII, Korridorin X dhe rrjetin trans-evropian të transportit, duke përmirësuar infrastrukturën rrugore dhe hekurudhore. U theksua rëndësia e vazhdimit të bashkëpunimit me partnerët ndërkombëtarë për të përshpejtuar investimet në sektorin e transportit, me qëllim që qytetarët dhe bizneset të përfitojnë nga një infrastrukturë më moderne, lëvizje më e shpejtë dhe më e sigurt. Ky bashkëpunim pritet të forcojë lidhjet e Kosovës me rajonin dhe Evropën, duke sjellë zhvillim ekonomik dhe lehtësim të komunikimit.