Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, prezantoi gjetjet e studimit mbi shfrytëzimin e burimeve natyrore dhe mallrave minimalisht të përpunuara në Kosovë, realizuar nga Rex Consulting Group dhe Civitta me mbështetjen e LuxDev. Studimi thekson se potenciali ekonomik i vendit nuk qëndron vetëm në burimet natyrore, por edhe në aftësinë për t’i përpunuar ato brenda vendit, duke krijuar vlerë të shtuar dhe vende të reja pune. Ministrja njoftoi se MINTI po mbështet sektorin prodhues përmes granteve për prodhim të mençur, digjitalizimit dhe modernizimit të proceseve, me qëllim rritjen e produktivitetit dhe konkurrueshmërisë së bizneseve vendore. Po ashtu, ministria po punon në zhvillimin e parqeve industriale të gjelbra dhe promovimin e ekonomisë qarkore për të siguruar që pasuritë natyrore të përpunohen në Kosovë dhe të kontribuojnë në zhvillimin ekonomik të qëndrueshëm.