Ministri në detyrë i Bujqësisë, Armend Muja, ka njoftuar se Ministria e Bujqësisë ka mobilizuar të gjitha kapacitetet për të ndihmuar fermerët e prekur nga dëmet e shkaktuara nga breshëri në Istog. Një shtab emergjent është themeluar dhe ndodhet në terren, ndërsa brenda 72 orëve pritet raporti i plotë mbi situatën dhe dëmet e shkaktuara, me epiqendrën në fshatin Kovragë dhe zona të tjera përreth. Dëmet kryesore janë në kulturat e misrit, mollëve, shalqirit dhe pjeprit, ndërsa gruri është prekur më pak për shkak të përfundimit të korrjes. Ministria bashkëpunon ngushtë me Komunën e Istogut dhe fermerët për të ndërmarrë masa agronomike dhe për të siguruar vazhdimësinë e prodhimit bujqësor, duke integruar edhe masa mbrojtëse ndaj ndryshimeve klimatike.