Ministri i Bujqësisë, Armend Muja, ka paralajmëruar masa të reja për mbrojtjen e kulturave bujqësore nga fenomenet ekstreme të motit, pas dëmeve të shkaktuara nga breshri në Komunën e Istogut. Ai njoftoi zgjerimin e mbështetjes për rrjetat mbrojtëse kundër breshrit, pilotimin e skemës së sigurimeve bujqësore dhe krijimin e një Qendre të Paralajmërimit të Hershëm që do t’u ofrojë fermerëve paralajmërime meteorologjike në kohë reale. Ministria do të angazhojë Institutin Bujqësor dhe Shërbimin Këshillimor për të ofruar këshilla profesionale për rikuperimin e prodhimit pas dëmeve, ndërsa javën e ardhshme do të hapet Skema e Granteve 2026 për investime në sera dhe rimbjellje. Muja theksoi se politikat e ministrisë do të fokusohen në parandalim, përshtatje dhe menaxhim të rrezikut për të krijuar një bujqësi më të qëndrueshme në kushtet e ndryshimeve klimatike.