Kryetari i Odës Ekonomike të Kosovës, Lulzim Rafuna, vizitoi qumështoren “VITA” për të njohur nga afër proceset e prodhimit, investimet në teknologji dhe bashkëpunimin me fermerët vendorë. Ai vlerësoi rëndësinë e lidhjes së qëndrueshme me fermerët dhe investimeve të vazhdueshme si bazë për rritjen e kapaciteteve dhe konkurrueshmërisë së produkteve vendore në tregjet rajonale dhe evropiane. Rafuna theksoi se zhvillimi i kompanive si “VITA” ka ndikim të drejtpërdrejtë në gjithë zinxhirin e industrisë së qumështit, duke përfshirë fermerët, prodhuesit dhe konsumatorët. Ai bëri thirrje për mbështetje institucionale të mëtejshme për të forcuar kapacitetet prodhuese dhe për të zgjeruar prezencën e produkteve “Made in Kosova” në tregjet ndërkombëtare.