Zyra Kombëtare e Auditimit (ZKA) ka zbuluar se Komuna e Prishtinës ka regjistruar mbi 7.7 milionë euro shpenzime në kategori ekonomike të gabuara, duke përfshirë përdorimin e fondeve të dedikuara për investime kapitale për pagesa të mallrave dhe shërbimeve, si dhe subvencione për shpenzime jashtë kategorive të parashikuara. Auditimi evidentoi gjithashtu 28 raste të tjera me pagesa në vlerë 4.43 milionë euro që nuk kishin lidhje me vendimet gjyqësore, por ishin regjistruar në mënyrë të pasaktë. Shkaku kryesor i këtyre gabimeve është mungesa e buxhetit të mjaftueshëm për mbulimin e obligimeve nga vendimet gjyqësore dhe mungesa e kontrolleve efektive në klasifikimin e shpenzimeve. ZKA ka rekomanduar Komunën e Prishtinës të përmirësojë mekanizmat e kontrollit dhe të zbatojë kërkesat ligjore për buxhetin, ndërsa komuna ka pranuar gjetjet dhe rekomandimet e auditorit, duke marrë një opinion të kualifikuar për pasqyrat financiare.