Zyra Kombëtare e Auditimit ka zbuluar probleme serioze në Sistemin e Integruar Informativ për skemat pensionale, i cili menaxhohet nga Ministria e Punës, Familjes dhe Vlerave të Luftës Çlirimtare. Sistemi nuk ka arritur të integrojë plotësisht të gjitha skemat pensionale dhe përballet me mangësi në zhvillim, cilësi të të dhënave dhe siguri të informacionit, duke rrezikuar saktësinë e pagesave dhe besueshmërinë e të dhënave. Auditimi evidenton se shumë procese kryhen ende manualisht, mungojnë kontrollet automatike dhe ka rrezik për pagesa të pasakta apo përfitime të dyfishta. Auditorja e Përgjithshme, Vlora Spanca, ka kërkuar masa urgjente për përmirësimin e sistemit, ndërsa ZKA ka dhënë 23 rekomandime për të rritur funksionimin dhe sigurinë e platformës.