Asociacioni i Komunave të Kosovës (AKK) ka akuzuar Ministrinë e Financave dhe Departamentin e Tatimit në Pronë për mosfunksionimin e sistemit të ri të tatimit në pronë, i cili është lansuar në gusht të vitit 2025. Pas nëntë muajsh, sistemi vazhdon të jetë jofunksional, duke shkaktuar humbje të mëdha të të hyrave vetanake për komunat dhe penalizime të padrejta për qytetarët përmes interesave dhe gjobave. AKK thekson se kjo situatë përbën një dështim serioz institucional që po dëmton financat komunale dhe funksionimin e administratës lokale, ndërsa Ministria e Financave ka zgjedhur heshtjen dhe neglizhencën. Në reagim kërkohet funksionalizimi urgjent i sistemit, një raport transparent publik, eliminimi i penaliteteve të padrejta dhe kompensimi i dëmeve financiare për komunat.