Guvernatori i Bankës Qendrore të Republikës së Kosovës, Ahmet Ismaili, i dorëzoi Kryetares së Kuvendit, Albulena Haxhiu, Raportin Vjetor të BQK-së për vitin 2025, duke theksuar stabilitetin financiar dhe qëndrueshmërinë e sistemit bankar në Kosovë. Raporti evidenton se ekonomia dhe sistemi financiar kanë përballuar me sukses sfidat e mjedisit ekonomik dhe gjeopolitik, me sektorin bankar të mirë kapitalizuar dhe me likuiditet të lartë. Në dokument përshkruhen gjithashtu reformat e ndërmarra, përfshirë avancimin e kornizës makroprudenciale, harmonizimin me standardet e BE-së, zhvillimin e sistemit të pagesave dhe përgatitjet për integrimin në Zonën Unike të Pagesave në Euro (SEPA). BQK ka arritur një rezultat financiar pozitiv prej 24 milionë euro, duke kontribuar në financat publike dhe duke forcuar qëndrueshmërinë institucionale, ndërsa vazhdon të mbështesë zhvillimin ekonomik dhe reformimin e sistemit financiar në mënyrë transparente dhe profesionale.