Tre operatorët kryesorë të energjisë në vend, KEDS, KESCO dhe KOSTT, kanë kërkuar një rritje prej mbi 20% të tarifave të energjisë elektrike, por Zyrja e Rregullatorit për Energji (ZRRE) ka njoftuar se tarifat aktuale do të mbeten në fuqi deri në përfundimin e procesit të konsultimit publik dhe publikimit të raportit përfundimtar. Kryetari i Bordit të ZRRE-së, Ymer Fejzullahu, ka bërë të ditur se vendimi përfundimtar do të merret vetëm pasi të përfundojë periudha dyjavore e konsultimit publik dhe të shqyrtohen komentet dhe ankesat e palëve të interesuara. Ai theksoi se deri më 1 prill, data kur zakonisht caktohen tarifat, nuk do të ketë ndryshime në çmimet aktuale të energjisë. Ndërkohë, KESCO ka argumentuar kërkesën për rritje tarifash me rritjen e kostove operative dhe nevojën për furnizim të qëndrueshëm të energjisë elektrike për vitin 2026.