Ministrja në detyrë e Industrisë, Ndërmarrësisë dhe Tregtisë, Mimoza Kusari-Lila, së bashku me zëvendësministrin e Mbrojtjes, Gegë Lleshi, kanë pritur një delegacion amerikan me ekspertë të fushave të ndryshme si teknologjia, inovacioni dhe biznesi. Gjatë takimit u diskutua për mundësitë e thellimit të bashkëpunimit ekonomik ndërmjet Kosovës dhe Shteteve të Bashkuara, duke u fokusuar në investime, transformim digjital dhe krijimin e vendeve të reja të punës. Delegacionit iu prezantuan prioritetet e Qeverisë së Kosovës për rritjen e prodhimit vendor, fuqizimin e eksporteve “Made in Kosova”, zhvillimin e parqeve industriale dhe teknologjike, si dhe mbështetjen e sektorit privat. Kusari-Lila theksoi mirënjohjen për mbështetjen e vazhdueshme amerikane në procesin e shtetndërtimit dhe zhvillimit demokratik, duke nënvizuar se partneriteti po merr një dimension gjithnjë e më ekonomik.