Ministrja e Ekonomisë së Kosovës, Artane Rizvanolli, priti një delegacion të lartë të Grupit të Bankës Botërore, ku u diskutua për bashkëpunimin aktual dhe planet për thellimin e partneritetit në sektorët strategjikë të energjisë dhe minierave. Palët vlerësuan bashkëpunimin e qëndrueshëm dhe rezultatet konkrete që kanë kontribuar në zhvillimin ekonomik dhe sigurinë energjetike të vendit. U theksua gatishmëria për të vazhduar bashkëpunimin në fusha si ankandet e energjisë së ripërtëritshme, përmirësimi i kornizës rregullative dhe rritja e efiçiencës së energjisë. Ministrja Rizvanolli e konsideroi Bankën Botërore një partner strategjik, ndërsa modelet e Kosovës në fushën e efiçiencës së energjisë po shihen si shembuj të suksesshëm në nivel rajonal.