Sezoni turistik në Vlorë ka nisur me rritje prej rreth 13% gjatë muajve mars, prill dhe maj krahasuar me vitin e kaluar, por sektorët e turizmit dhe akomodimit shprehin shqetësim për anulimet e rezervimeve nga turistët e huaj. Këto anulime lidhen me pasigurinë dhe perceptimet negative që kanë krijuar zhvillimet e fundit në Shqipëri, përfshirë protestat e vazhdueshme, të cilat sipas operatorëve mund të dëmtojnë imazhin e vendit dhe të ndikojnë në ekonominë lokale. Disa turistë që ndodhen aktualisht në Vlorë thonë se nuk ndihen të rrezikuar dhe vazhdojnë planet e tyre të udhëtimit, ndërsa të tjerë pranojnë se situata mund të krijojë një perceptim jo plotësisht pozitiv. Megjithatë, sektori turistik mbetet optimist për një sezon të suksesshëm, duke u mbështetur në numrin rekord të vizitorëve të huaj që Shqipëria ka pasur vitet e fundit.