Autoriteti Rregullator për Shërbimet e Ujit ka marrë një vendim të rëndësishëm për sezonin veror 2026, duke ndaluar përdorimin e ujit të pijshëm nga sistemi publik për qëllime që nuk lidhen me nevojat themelore të konsumit njerëzor. Kjo përfshin ndalimin e ujitjes së rrugëve, trotuareve, kopshteve, larjen e automjeteve, mbushjen e pishinave dhe përdorime të tjera jo thelbësore. Ofruesit e shërbimeve të ujit janë të detyruar të monitorojnë dhe të ndërmarrin masa për të reduktuar furnizimin në rastet e keqpërdorimit. Vendimi ka hyrë në fuqi më 1 qershor dhe do të zbatohet deri më 31 tetor 2026, me qëllim ruajtjen e kapaciteteve furnizuese dhe garantimin e furnizimit të qëndrueshëm me ujë të pijshëm gjatë periudhës së thatësirës.