Enti Shtetëror i Statistikës ka publikuar të dhënat për vitin 2024, sipas të cilave shkalla e varfërisë në Maqedoni është 21,9 për qind, që do të thotë se më shumë se një e pesta e popullsisë jeton me të ardhura nën pragun e varfërisë. Situata është veçanërisht kritike për familjet me shumë anëtarë dhe prindërit e vetmuar, ku shkalla e varfërisë arrin përkatësisht në 54,8 dhe 45,8 për qind. Fëmijët dhe të rinjtë deri në 17 vjeç janë grupi më i cenueshëm me një shkallë varfërie prej 29,5 për qind, ndërsa të papunët përballen me një shkallë varfërie prej 45,7 për qind. Ekspertët theksojnë mungesën e politikave sociale efektive dhe paralajmërojnë se pa transfertat sociale dhe pensionet, shkalla e varfërisë do të ishte pothuajse dyfish më e lartë, duke rrezikuar stabilitetin social në vend.