Një peticion me mbi 110 mijë nënshkrime u dorëzua në Kancelarinë Federale të Zvicrës, duke kërkuar zgjatjen e pushimit të lehonisë nga 14 javë në gjashtë muaj. Nismëtarët argumentojnë se periudha aktuale prej 98 ditësh është shumë e shkurtër për të ndërtuar lidhjen emocionale dhe për të siguruar zhvillimin e shëndetshëm të foshnjës, e cila në moshën tre muajshe mbetet plotësisht e varur nga nëna. Peticioni thekson gjithashtu rëndësinë e kohës së mjaftueshme për rikuperimin fizik dhe psikologjik të nënës pas lindjes, si dhe nevojën për një ekuilibër më të mirë mes jetës familjare dhe asaj profesionale. Debati në Zvicër për zgjatjen e pushimit prindëror vijon prej kohësh, me iniciativa që synojnë modele të reja për të dy prindërit.