Gjykata Themelore në Ferizaj ka caktuar masën e paraburgimit prej një muaji për dy zyrtarë të KEDS-it, të cilët dyshohen për marrje ryshfeti. Sipas vendimit të gjykatës, më 25 shkurt 2026, dy të pandehurit B.B. dhe E.K., në pozicione kyçe në departamentet e kontrollit dhe lidhjeve të reja, kërkuan 400 euro nga një konsumator për të përshpejtuar vendosjen e njësorit elektrik në lokal. Ata kërcënuan se nëse nuk paguhej shuma, vendosja do të vonohej për pesë deri në gjashtë muaj. Pas masave hetimore, ata u kapën në flagrancë dhe u arrestuan nga Policia e Kosovës, ndërsa gjyqtari i procedurës paraprake miratoi kërkesën e prokurorisë për paraburgim, duke theksuar se ankesa nuk e shtyn ekzekutimin e këtij vendimi.