Gjykata e Durrësit ka vendosur 12 masa sigurie ndaj ish-funksionarëve të Hipotekës dhe personave privatë, të dyshuar për përfshirje në një skemë të organizuar të tjetërsimit të pronave shtetërore përmes falsifikimit të dokumenteve. Hetimi katërvjeçar i Prokurorisë ka zbuluar parregullsi të shumta në regjistrat hipotekorë, ku nga 1063 regjistra të kontrolluar vetëm 152 kanë rezultuar të rregullt, duke ngritur dyshime për manipulime dhe ndërhyrje të paligjshme. Masa sigurie përfshijnë arrest në burg, arrest shtëpie dhe detyrim për paraqitje në polici, ndërsa personat e përfshirë dyshohen për veprat penale të mashtrimit, falsifikimit të dokumenteve, shpërdorimit të detyrës dhe pastrimit të produkteve të veprës penale. Hetimet vijojnë për të zbardhur rolin e secilit në këtë skemë dhe për të sqaruar pronat që janë tjetërsuar në mënyrë të paligjshme.