Në Qendrën Korrektuese në Smrekonicë, 13 të burgosur kanë përfunduar me sukses programin rehabilitues “Menaxhimi i Zemërimit”, i cili synon zhvillimin e aftësive psikosociale, rritjen e vetëkontrollit emocional dhe përmirësimin e sjelljes ndërpersonale. Programi është realizuar në përputhje me politikat rehabilituese dhe standardet profesionale për trajtimin e të burgosurve, duke u udhëhequr nga zyrtarë socialë profesionistë si Hidajete Hyseni, Nehat Haradinaj dhe Lauretë Mlinaku. Në ceremoninë e shpërndarjes së certifikatave morën pjesë zyrtarë të lartë të Shërbimit Korrektues të Kosovës, duke përfshirë Zëvendësdrejtorin e Përgjithshëm për Trajtimin e të Burgosurve, Ridvan Hotin, Drejtoreshën e Departamentit për të Burgosur dhe të Mitur, Trendelina Qorraj, dhe Drejtorin e Qendrës Korrektuese në Smrekonicë, Avni Miftarin. Ky aktivitet tregon përkushtimin e Shërbimit Korrektues të Kosovës në forcimin e qasjes humane dhe profesionale ndaj të burgosurve, me qëllim rehabilitimin e tyre dhe rritjen e sigurisë publike.