Një 15-vjeçar nga Dragashi ka treguar shembull të lartë ndershmërie dhe përgjegjësie qytetare pasi gjeti një kuletë me 153 euro dhe dokumente personale në rrugën Dragash-Brod, pranë fshatit Kukajan. Ai e dorëzoi menjëherë kuletën në stacionin policor, ku falë dokumenteve brenda saj, policia identifikoi dhe kontaktoi pronarin. Një ditë më vonë, personi që kishte humbur kuletën u paraqit në polici për t’i marrë sendet e tij dhe shprehu falënderimet për veprimin e ndershëm të të miturit dhe për angazhimin e policisë. Policia e Kosovës vlerësoi lart këtë veprim, duke e cilësuar si një shembull pozitiv për gjithë qytetarët.