Gjykata Themelore në Ferizaj ka dënuar të pandehurin B.S. me 16 vite e gjashtë muaj burgim për dy vepra penale të sulmit seksual në vazhdim ndaj të miturve, kryesisht djemve të moshës 12 dhe 13 vjeçare. Ngjarjet kanë ndodhur në periudhën qershor 2024 deri në shkurt 2025, ku i akuzuari ka sulmuar seksualisht viktimat në kohë të pacaktuara. Dënimi unik do të ekzekutohet pas plotfuqishmërisë së aktgjykimit, ndërsa masa e paraburgimit ndaj tij vazhdon deri në këtë moment, por jo më gjatë se dënimi i shqiptuar. Palët kanë të drejtë të ankohen brenda 30 ditëve nga marrja e aktgjykimit në formë të shkruar, me ankesën që do të shqyrtohet nga Gjykata e Apelit përmes Gjykatës Themelore në Ferizaj.