Një aksident i rëndë ndodhi mbrëmjen e së premtes në zonën e Fanit, në Mirditë, ku një 16-vjeçar mori pa leje një makinë dhe humbi kontrollin e saj, duke u përplasur me një shtyllë ndriçimi. Në automjet ndodheshin gjashtë të mitur, të gjithë kushërinj, të cilët u plagosën, disa me fraktura dhe dëmtime të ndryshme. Të plagosurit u morën fillimisht me ndihmën e parë dhe më pas u transportuan me gjashtë autoambulanca në spitale të Tiranës për trajtim të specializuar, por fatmirësisht janë jashtë rrezikut për jetën. Policia dhe grupi hetimor janë në vendngjarje dhe po vijojnë hetimet për të përcaktuar shkaqet e sakta, ndërsa 16-vjeçari është proceduar në përputhje me ligjin.