Një vajzë 16-vjeçare nga Prishtina, e cila ishte raportuar e zhdukur që nga mesi i qershorit, është kthyer vetë në familjen e saj pas tri javësh. Babai i saj kishte njoftuar policinë për largimin e saj më 16 qershor, duke theksuar se kjo nuk ishte hera e parë që ajo largohej dhe se nuk kishte mundësi kontakti për shkak të mungesës së telefonit. Pas kërkimeve të nisura me urdhër të Prokurorit të Shtetit, e mitura u paraqit më 5 korrik në Stacionin Policor “Veriu” në Prishtinë, ku u intervistua në prani të prindit dhe përfaqësuesve të Qendrës për Punë Sociale. Pas konsultimit me Prokurorin, u vendos që vajza të kthehet në familje, duke mbyllur kështu rastin e raportuar si person i zhdukur.