Policia e Tiranës ka proceduar penalisht në gjendje të lirë 19 persona për organizimin dhe nxitjen e bllokimit të aksit rrugor drejt Aeroportit Ndërkombëtar “Nënë Tereza” në Rinas. Tubimi, i cili fillimisht ishte planifikuar të zhvillohej në sheshin “Skënderbej” dhe pranë godinës së Kryeministrisë, u zhvendos në mënyrë të papritur drejt rrugës së aeroportit, duke shkaktuar pengesa të mëdha në qarkullimin e mjeteve dhe lëvizjen e qytetarëve. Personat e proceduar akuzohen për veprat penale “Pengimi i qarkullimit të mjeteve të transportit”, “Organizimi dhe pjesëmarrja në grumbullime të paligjshme” dhe “Prishja e rendit dhe qetësisë publike”. Gjatë veprimeve hetimore janë sekuestruar dy automjete si prova materiale, ndërsa materialet i janë referuar Prokurorisë për ndjekje të mëtejshme ligjore. Policia vijon punën për identifikimin e personave të tjerë të përfshirë në këtë ngjarje.