Një 25-vjeçare, A. D., e cila pësoi djegie në rreth 85% të sipërfaqes së trupit si pasojë e zjarrit që shpërtheu në hotelin ku po qëndronte për pushime në Vlorë, është transferuar për trajtim të specializuar në Turqi. Ajo u trajtua fillimisht për dy ditë në Qendrën Spitalore Universitare “Nënë Tereza” në Tiranë, ku qëndroi në terapi intensive për shkak të gjendjes së rëndë. Pas stabilizimit dhe përfundimit të procedurave mjekësore dhe administrative, transferimi u realizua në bashkëpunim me Ambasadën e Turqisë dhe autoritetet shëndetësore turke, në një spital të specializuar për trajtimin e djegieve të rënda. Shpenzimet e trajtimit do të mbulohen nga shteti shqiptar përmes Ministrisë së Shëndetësisë dhe Mirëqenies Sociale, ndërsa ekipet mjekësore do të vazhdojnë monitorimin e gjendjes së pacientes gjatë trajtimit jashtë vendit.