Gjatë 24 orëve të fundit në Shqipëri janë regjistruar 27 vatra zjarri, nga të cilat 5 mbeten ende aktive dhe 2 të tjera po monitorohen nga autoritetet. Operacionet e shuarjes po kryhen me angazhimin e 42 automjeteve zjarrfikëse, 371 forcave operacionale dhe mbështetjen e 153 efektivëve të Forcave të Armatosura, përfshirë 4 helikopterë dhe një avion “Air Tractor”. Situata në zonat e prekura si Cikallesh, Dajt, Priskë e Madhe, Mallakastër, Koilaç, Greshicë, Hekal dhe Abaze është nën kontroll dhe nuk paraqet rrezik për banorët. Në zonën e Krastës, operacionet po mbështeten nga ajri për shkak të terrenit të vështirë, ndërsa në Vilëz të bashkisë Kurbin zjarri vijon aktiv, por ndërhyrja e helikopterëve ka parandaluar përhapjen dhe ka shmangur rrezikun për kishën, varrezat dhe banesat në zonë.