Në fshatin Kalludër të Vogël në Komunën e Zubin Potokut dyshohet të jetë varreza masive e 23 civilëve shqiptarë të vrarë më 19 prill 1999, një nga krimet më të rënda të luftës në Kosovë. Drejtoresha e Fondit për të Drejtën Humanitare në Beograd, Natasha Kandiq, ka denoncuar se policia serbe kishte dijeni për këtë krim që nga dita e vrasjes, por në vend që të hetonte, urdhëroi groposjen e trupave për të fshehur ngjarjen. Informacioni për varrezën masive u bë publik në vitin 2013, bazuar në dëshminë e serbit Ranko Tepavac, por deri më sot nuk është zhvilluar asnjë hetim konkret nga institucionet ndërkombëtare apo ato të Kosovës.