Më 1 prill 1999, forcat serbe kryen masakra të rënda në fshatin Lybeniq të Pejës dhe në lagjen e parë të Gjakovës, duke vrarë dhjetëra civilë shqiptarë, përfshirë burra, gra dhe fëmijë. Në Lybeniq, mbi 80 persona u ekzekutuan nga forcat paramilitare serbe të njohura si “Çakejt”, ndërsa në Gjakovë më shumë se 60 banorë u vranë dhe u dogjën në shtëpitë e tyre, duke përfshirë familjet Vejsa, Hoxha, Cana dhe të tjera. Masakrat përfshinin edhe viktima të mitur dhe gra shtatzëna, të cilët vazhdojnë të figurojnë si të zhdukur. Familjarët e viktimave kërkojnë drejtësi dhe zbardhjen e plotë të fatit të të zhdukurve, ndërsa këto ngjarje mbeten ndër krimet më makabre të luftës në Kosovë.